Saga Hnífsdals

Saga Hnífsdals er saga fólksins þar frá landnámi til sameiningar við Ísafjörð árið 1971. Metnaðarfullt fræðiverk og heillandi saga Hnífsdælinga fram á okkar daga – stór saga af litlu þorpi sem markaði spor í sögu þjóðarinnar. „Efnistök eru fjörleg og bókin lipurlega skrifuð og áhugaverð, ekki bara fyrir Hnífsdælinga.“ Sölvi Sveinsson, Morgunblaðinu

Hér er lýst sviptingasamri jarðasögu, frá eignarhaldi Vatnsfirðinga fyrr á tímum til áhrifa heimamanna og Ögurmanna.

Mikil útgerð þróaðist í Hnífsdal upp úr miðri 19. öld og myndaðist stórt þorp með hátt í 500 íbúum. Voru aflaverðmætin sem komu þar á land með því mesta á landinu og mannlífið gróskumikið.

Hér er einnig sögð saga stéttaátaka á milli verkafólks og land­eigenda á þriðja áratug 20. aldar. Upp úr þeim urðu langvarandi málaferli í svonefndu Hnífsdalsmáli milli Ísafjarðarkrata og Hálfdáns Hálfdánssonar hreppstjóra í Búð, sem var ásakaður um atkvæðafölsun, og höfðu þau mikil og varanleg áhrif á stjórnmálalíf landsins.