Komdu í heimsókn til Adda og Tedda í nýstækkaða trjáhúsið þeirra, sem er nú með 13 glænýjum hæðum. Þar má m.a. finna klessubílabraut, hjólabrettaramp, þyngdarleysistank, íshöll með 78 bragðtegundum og Völundarvitið, sem er völundarhús sem enginn hefur nokkru sinni ratað aftur út ... alla vega ekki enn. Jæja, eftir hverju ertu að bíða? Komdu upp!
Milla og Milla eru bestu vinkonur sem heita ekki aðeins sama nafni heldur eru jafn góðar í að finna upp á einhverju sniðugu. Þess vegna fjallar þessi bók um allt í senn, undarlegar kökur, óperur, gerviaugu, Línu kennara, Bassa hund, Jónas stóra bróður og heimsins fullkomnasta prump! Bráðskemmtileg og lifandi saga með stóru letri og fyndnum myndum.
Listakonan amma Köben slær í gegn og vill bjóða allri fjölskyldunni í heimsókn. Hljómar vel, hvað gæti klikkað? Tvíburarnir kunna þó ekki á kopp (Stella verður að redda því eins og öðru) og svo er nýi danski kærasti ömmu full-fáklæddur fyrir þeirra smekk. Þessi bók ætti eiginlega að heita Amma Köben og mesta rugl í heimi!
Fjör á hrekkjavöku! Jólasveinarnir hafa verið ósköp prúðir síðustu áratugina. En þegar Stekkjastaur fréttir af hrekkjavökunni rifjast upp fyrir honum hvað þeir bræður voru áður miklir hrekkjalómar. Ó, þvílíkt fjör hjá þeim ... en bæjarbúar eru ekki eins ánægðir ...
Í Skollavík situr enginn aðgerðalaus, þar er nóg að gera þótt engir vegir liggi þangað og símasamband náist aðeins á einum hól. Nú hefst allskonar bauk og brall - stíflugerð í ánni, sandkastalasmíð og vegalagning í fjörunni.
Í þessari bók er bekkurinn á leið í dýragarðinn. Binna er umsjónarmaður og reynir að halda röð og reglu. Eru ekki örugglega allir að hlusta á hana? Bækurnar um Binnu B henta vel fyrir yngstu lesendurna.
Í þessari bók langar Binnu mikið í bangsakanínu en hún á ekki næga peninga. Hún fær sér ýmsa aukavinnu og sem betur fer hjálpar Jónsi vinur hennar til. Bækurnar um Binnu B henta vel fyrir yngstu lesendurna.
Hér er komin 18. bókin í þessum vinsælasta bókaflokki heims. Skólagangan hjá Kidda klaufa hefur ekki alltaf verið dans á rósum. Hann er því ekkert of órólegur þegar fréttist að eigi að loka skólanum vegna skemmda, en brátt fara að renna tvær grímur á Kidda. Íslenskar þýðingar Helga Jónssonar á Kidda klaufa eru margverðlaunaðar.
Nýr rímnaflokkur handa börnum á öllum aldri. Rímurnar eru tíu talsins, hver og ein snýst um tiltekið dót eða leikföng. Þar gengur á ýmsu og flest reynist dótið frekar misheppnað. Allt þar til kemur að níundu rímu sem fjallar um bækur. Í beinu framhaldi kemur tíunda og síðasta ríman en þar birtist loks besta dót sem við eigum.
Smásaga eftir Enid Blyton skreytt glænýjum litmyndum: Tommi tekur eftir mjög grunsamlegu fólki um borð í lest. Hvað er svona óvenjulegt við einn farþegann? Hvernig munu hin fimm fræknu leysa þessa ráðgátu?
Áttunda bókin um hina heimsfrægu Fíusól sem er í logandi vandræðum. Það er eldgos í Vindavík, Bjössi byssó flytur í götuna, Fíasól tínir upp skítalummur og syngur í Skólóvisjón. Halldór Baldursson teiknar sem fyrr veröld Fíusólar.
Þriðja bókin um krakkana í Mýrarsveit, þau Stellu, Ella og Bellu sem búa með pabba sínum í gráa húsinu og Móses sem býr með mæðrum sínum þremur í bláa húsinu. Einn daginn birtast óprúttnir gestir með ískyggileg plön um framtíð mýrarinnar í farteskinu. Skemmtileg og spennandi saga sem tekur á brýnum málum eins og umhverfisvernd og börnum á flótta.
Fuglar á Fróni er fræðandi, áhugaverð og glæsilega myndskreytt vísnabók um 24 fuglategundir sem finna má á Íslandi. Eflaust leynist uppáhaldsfuglinn þinn hér.
Bókaflokkurinn fjallar um Gling Gló sem fer stundum í pössun til ömmu og leikur sér þar við Óbó vin sinn. Þetta er fjórða bókin um Gling Gló. Dag nokkurn gerir hún svolítið sem hún ekki má og skrökvar svo um það. Amma sem er hjátrúarfull segir að börn fái svartan blett á tunguna ef þau segja ekki satt. Fallegar myndir eru í bókinni.
Hendi! Fjallar um fótboltastrákinn Hallgrím og eftirminnilegt atvik á battavellinum. Þegar þeir Amir keppa á móti eldri krökkum í fótbolta heyra þeir sögu sem ásækir þá. Missti Úlfur í alvörunni hendina í ísbjarnarárás á Grænlandi? Eða var það hákarl…?
Jónsi er hlédrægur strákur sem þarf að takast á við alls konar áskoranir, stundum með hjálp bestu vinkonu sinnar, hennar Binnu B. Í þessari bók ákveða Jónsi og Binna að taka upp matreiðsluþátt. Ætli þau séu góðir bakarar? Bækurnar um Jónsa henta vel fyrir yngstu lesendurna.
Jónsi er hlédrægur strákur sem þarf að takast á við alls konar áskoranir, stundum með hjálp bestu vinkonu sinnar, hennar Binnu B. Í þessari bók finnur Jónsi púpu í garðinum og bíður spenntur eftir því að fiðrildið skríði út. En er þetta örugglega fiðrildapúpa? Bækurnar um Jónsa henta vel fyrir yngstu lesendurna.
Jólympíuleikarnir! Matthildur var svo viss um að það væri frábær hugmynd að láta jólasveinana keppa í alls konar jólaþrautum í sjónvarpinu. Þá myndu þeir hætta að rífast um hver væri mestur og bestur. Jólaandinn færðist aftur yfir bæinn og pabbi héldi starfinu hjá sjónvarpsstöðinni. En núna er allt farið í vaskinn.