Vegferð til farsældar

Vilhjálmur Egilsson fjallar um þróun íslensks samfélags undanfarna áratugi og sýn sína á nokkur mikilvæg viðfangsefni sem framundan eru. Vilhjálmur bendir á að íslenskt samfélag sé nú í fremstu röð vegna margvíslegra umbóta sem gerðar voru á tíunda áratug síðustu aldar. En hvert stefnir, hvað má betur fara og á hvað ber að leggja áherslu?

Um leið og Vilhjálmur svarar þessum spurningum kryddar hann umfjöllun sína með fjölmörgum skemmtilegum sögum af ýmsu sem fyrir hann hefur borið á fjölbreytilegri ævi.

Vilhjálmur Egilsson (f. 1952) hefur starfað í Sjálfstæðisflokknum frá unglingsárum. Hann var formaður Sambands ungra sjálfstæðismanna á árunum 1985–1987 og alþingismaður flokksins á árunum 1991–2003. Á starfsferli sínum hefur Vilhjálmur ennfremur verið hagfræðingur Vinnuveitendasambands Íslands, framkvæmdastjóri Verslunarráðs Íslands og Samtaka atvinnulífsins, ráðuneytisstjóri í sjávarútvegsráðuneytinu, setið í framkvæmdastjórn Alþjóðagjaldeyrissjóðsins og verið rektor Háskólans á Bifröst. Hann hefur víðtæka reynslu og þekkingu á íslensku samfélagi og hefur á ferli sínum í ýmsum hlutverkum komið að mörgum stórum ákvörðunum um málefni þess.