Fuglar í náttúru Íslands
Í íslenskri náttúru eru augnablik sem lifa lengur en orð fá lýst. Fuglar tilheyra þeim augnablikum. Þeir birtast og hverfa með vindinum, eins og hluti af birtunni sjálfri — svartir punktar yfir gráum vetrarhimni, hvítir vængir yfir briminu. María Björg Gunnarsdóttir hefur myndað fugla árum saman og hér er afraksturinn á fallegri bók.
Hver fugl á sína sögu
„Ég hef alltaf haft mikinn áhuga á fuglum og náttúrunni. Frá unga aldri hef ég notið þess að fylgjast með fuglalífi, læra um mismunandi tegudir og kynnast því hvernig fuglar lifa og haga sér. Með þessari bók langar mig að deila þeirri gleði og forvitni sem fuglar vekja. Von mín er að lesendur læri eitthvað nýtt, taki betur eftir fuglunum og njóti þess að skoða náttúruna með opnum augum.
Ég trúi því að hver fugl eigi sína sögu og að með því að kynnast þeim betur lærum við að meta náttúruna og vernda hana.“
María Björg Gunnarsdóttir