Klingsor

Þessi ótrúlega ævisaga listamanns er eitt dæmið enn úr smiðju sænska stílsnillingsins Torgnys Lindgren þar sem tekist er á við alvarlegar og flóknar spurningar með vopnum listarinnar. Sagnaheimur þar sem allt getur gerst og skammt er milli ærsla og harms.

Torgny Lindgren var einn mesti stílsnillingur sænskra nútímabókmennta, ljóðskáld, skáldsagnahöfundur og leikskáld. Hann hlaut margvíslegar viðurkenningar fyrir verk sín og var kjörinn í Sænsku akademíuna. Bækur hans hafa verið þýddar á yfir 30 tungumál.

Klingsor er fjórða skáldsagan eftir Torgny Lindgren sem Ugla hefur gefið út í öndvegisþýðingum Heimis Pálssonar. Hinar eru: Norrlands Akvavit, Lokasuðan og Biblía Dorés.

Torgny Lindgren (1938–2017) var eitt fremsta sagnaskáld Svía, oft nefndur með Söru Lidman og P.O. Enquist sem meginskáld norðlensku sagnahefðarinnar. Margar sögur Lindgrens, stuttar og langar, gerast í Vesturbotni eða innsveitum Vesturbotns, og reyndar kemur hann sjálfur við sögurnar, dulbúinn eða með réttu nafni.

Fjórar skáldsagnanna mynda heild, að sögn höfundarins: Randafluguhunang, Norrlands Akvavit, Lokasuðan og Biblía Dorés. Þær hafa nú allar komið út á íslensku. Hannes Sigfússon þýddi hina fyrstu, en Heimir Pálsson hinar þrjár ásamt Klingsor.

Torgny Lindgren var mikill aðdáandi Halldórs Laxness. Hann hafði Kristnihald undir Jökli í miklum metum og sagði að í henni væri vísað á nýja leið til að segja sögu. Leitin að sögumanninum (Umba) í Vesturbotnssögunum varpar talsverðu ljósi á skyldleika höfundanna.

Heimir Pálsson (f. 1944) var lengst af launavinnualdurs kennari við menntaskóla og háskóla, síðast lektor við Uppsalaháskóla. Hann hefur skrifað um íslenskar bókmenntir greinar, ritgerðir og námsefni og séð um útgáfur, meðal annars á Snorra-Eddu. Meðal nýjustu verka hans eru Bók þessi heitir Edda (2014), um Uppsalagerð Snorra-Eddu,Örlagasaga Eyfirðings (2017), um Jón frá Rúgsstöðum í Eyjafirði, fyrsta íslenska stúdentinn í Uppsölum, Vísur Bakkabræðra (2019), ásamt með Kristni Jóhannessyni og Böðvari Guðmundssyni, auk þýðinga hans á Leiðinni í Klukknaríki eftir Nóbelsskáldið Harry Martinson og rómuðum bókum Torgnys Lindgrens, Norrlands Akvavit, Lokasuðunni, Biblíu Dorés og Klingsor.