Kynslóð

„Maríanna Maístjarna Helgudóttir, enn einn bagginn sem fylgir því að burðast með barnunga móður á herðunum. Mamma mín var fimmtán ára en ekki á föstu og svo sannarlega ekki sextán ára í sambúð, heldur ólétt eftir helsta spraðurbassann í plássinu. Ég veit aldrei hvort ég heiti í höfuðið á ljóshærðri dúkku sem lygndi aftur augunum, eða rauðbröndóttri kvígu með hvítt í krúnunni sem mamma fann nýfædda og móðurlausa í skurði eitt sumarið. Kannski báðum.“

Hin tvítuga Maríanna, eða Anna, vinnur í Skálanum – á milli þess sem hún skemmtir sér með kærastanum Andra og aðstoðar ömmu sína og afa við bústörfin. Svo þarf að tækla foreldrana. En framtíðin lúrir handan við hornið og Ransí á Giljum sér breytingar í bollunum sínum. Og svo birtist nýr strákur með kunnuglegan svip í þorpinu ...
Kynslóð er stórskemmtileg og djúpvitur skáldsaga um fólk á ýmiss konar vegamótum þar sem fortíð og framtíð er teflt saman í raunsæislegri frásögn – þar sem þó er ekki allt sem sýnist.