Þér eruð ekki neitt, fröken Sigríður!

Frá fátæku heimili á Ströndum til Grænlands, Bandaríkjanna og ferðalaga um heiminn – Sigríður Ólafsdóttir Meyburg lét aldrei mótlæti ráða för. Faðir hennar fórst með togaranum Jóni forseta þegar hún var barn og í kjölfarið leystist heimilið upp. Þetta er mögnuð saga af konu sem fór sínar eigin leiðir og sjaldan er rómantíkin langt undan.

Þrátt fyrir erfiðar aðstæður aflaði Sigríður sér menntunar og hélt til Danmerkur í framhaldsnám í skurð- og geðhjúkrun, þá einstæð móðir. Hún ruddi sér braut á tímum þegar fáar konur áttu þess kost.

Á Grænlandi starfaði Sigríður í nokkur ár og kynntist þar ástinni sem átti eftir að leiða hana til Bandaríkjanna, þar sem hún bjó og starfaði í rúma sex áratugi. Á efri árum ferðaðist hún víða og fluttist á ný til Íslands, rétt undir nírætt.

Sigríður var ákveðin, hreinskilin og lífsglöð kona sem sinnti starfi sínu af ástríðu og stóð ætíð fast á eigin sannfæringu – bæði í lífi og starfi.

Í þessari lifandi og athyglisverðu ævisögu segir Sigrún Hildur Kristjánsdóttir sögu ömmusystur sinnar og dregur upp áhrifamikla mynd af konu sem fór eigin leiðir á tímum mikilla breytinga. Um leið opnar hún glugga inn í samfélag og lífshætti sem nú heyra sögunni til.