Vísnakver eftir Þórarin sem geymir yfir eitthundrað nýjar stökur hans, erindi eða kviðlinga undir ýmsum bragarháttum. Ótal teikningar eftir Hugleik Dagsson prýða bókina. Sumar þessara yrkinga nálgast það að vera einskonar spakmæli sem iðulega fá á sig spaugsaman blæ.
Nýortar þulur Þórarins handa börnum, foreldrum þeirra og öðrum aðstandendum. Myndir eru eftir Lindu Ólafsdóttur. Í bókinni hefur skáldið komið sér fyrir í einu helsta kjörlendi íslenskrar tungu, þuluhefðinni, og þylur frá morgni til kvölds um liti og tóna, fugla og veður, tröll og drauga, berjamó og stjörnuhimin, svo fátt eitt sé talið.
Bókin inniheldur á fjórða tug smásagna Þórarins sem Kristján Þórður Hrafnsson hefur valið úr fyrri sagnasöfnum hans, átta talsins. Meðal sagnanna eru ýmsar sem telja má klassískar, svo sem Síðasta rannsóknaræfingin, Tilbury, Orðanna hljóðan og Íþróttabyltingin.