Gertie býr með mömmu sinni og ömmu í yndislegum litlum bæ nyrst í Skotlandi, þar sem fólkið er samheldið og náttúran ægifögur. Það er þó ekki ævintýrum fyrir að fara hjá Gertie. Hún hefur unnið í sömu kjörbúðinni síðan hún lauk skóla og félagslíf hennar snýst aðallega um prjónaklúbb skoðanaglaðra kvenna. En skjótt skipast veður í lofti.
Bananar eru mest seldu ávextir á Íslandi, en Pálmi veit álíka mikið um banana og flest okkar – sama sem ekki neitt. Hann er nýfluttur í blokk þar sem hann þekkir engan og honum leiðist óskaplega. Þegar foreldrar hans gefa honum framandi túkanfugl hressist Pálmi við, allt þar til fuglinn sleppur út í hrímkalt skammdegið.
Forvitnileg bók sem opnar börnum jafnt sem fullorðnum heim íslenskrar byggingarsögu frá landnámi til dagsins í dag. Hér kynnumst við 40 ólíkum húsum sem eru eða voru heimili fólks. Öll hafa þau sögu að segja af tísku og tíðaranda, því íslensk húsasaga er samfélagsspegill sem hjálpar okkur að fá betri skilning á umhverfi okkar.
Milan býr í París ásamt foreldrum sínum. Móðir hans er frá Rúanda en er harðákveðin í því að tala aldrei um fortíðina. Dag einn birtist ungur frændi frá Kigali og þeir Milan tengjast bræðraböndum. Þegar frændinn hverfur er forvitni Milans vakin. Í leit að uppruna sínum opnast augu hans fyrir landi og fjölskyldu sem hann vissi ekki að hann ætti.
Mirren Sutherland er stödd í ævagömlum kastala með turnspírum, fjórum bókasöfnum og dularfullu völundarhúsi. Landið er komið í vetrarbúninginn fyrir jólin og ungur, laglegur landeigandi hefur ráðið hana til að finna dýrgrip sem liggur falinn einhvers staðar á landareigninni.
Ponna og Kali reyna hvað þau geta til að eignast barn en allt kemur fyrir ekki. Síðasta hálmstráið er lokakvöld árlegrar musterishátíðar þegar allir karlar eru guðir en það gæti reynst þeim dýrkeypt.
Shaka er með vöðvasjúkdóm, en þótt líkamleg geta hennar sé takmörkuð þekkir hugurinn engin mörk: Hún stundar fjarnám í háskóla, birtir hispurslausar fantasíur á erótískum vefsíðum og tístir nafnlausum stóryrðum út í tómið. Einn daginn sendir hún frá sér tilboð um himinháa upphæð í skiptum fyrir sæði og hrindir þar með af stað óvæntri atburðarás.
Þetta kvæði fjallar um dreng sem verður fyrir þeirri sérkennilegu lífsreynslu að eignast lítinn bróður. Skyndilega færist athygli allrar fjölskyldunnar yfir á þennan litla bróður sem þó virðist ekkert vita í sinn haus og orgar allar nætur svo engum kemur dúr á auga. Hvað er eiginlega til ráða? Bara eitt: Að skila honum.
Brennu-Njáls saga hefur allt sem góða sögu prýðir: ástir og afbrýði, vináttu og fjandskap, svik og hefndir, blóðuga bardaga og auðvitað dramatíska brennu. Fersk og brakandi útgáfa sem höfðar jafnt til forfallinna Njáluunnenda og þeirra sem lesa söguna í fyrsta sinn.
Töfrandi bók fyrir yngstu lesendurna sem umbreytir myndum með einföldum spegli. Á augabragði breytist fiskur í kött og bangsi í skjaldböku!
Rósa flytur ásamt írskum eiginmanni sínum í frumskóginn á Kyrrahafsströnd Kólumbíu. Þegar eiginmaðurinn tekur sér ferð á hendur til næstu borgar er Rósa ein í hálfköruðu, hurðarlausu húsi. Regnskógarparadísin við ströndina breytist smám saman í martröð því ógnir leynast á hverju strái: hættuleg dýr, háskalegur gróður og vafasamir nágrannar.
Forfallinn safnari fær vídeóspólu með vandræðalegu efni í hendurnar. Sérvitur verðlaunahöfundur hefur haslað sér völl á samfélagsmiðlum undir dulnefninu Hjartakonan. Myndbandsgreinandi hjá Interpol er haldinn Tetris-fíkn og sendur í veikindaleyfi til Íslands. Dag einn fléttast líf þeirra saman á óvæntan hátt.