Síða 3 af 5
Hvenær drepur maður mann? Hér kynnumst við breyskum einstaklingum og fólki sem verður öðrum að bana – í grandaleysi. Að baki búa ýmsar ástæður: heift, hatur, hefnd, öfund, afbrýðisemi og logsár girnd, græðgi, árátta, spilling en líka óyndi, andúð og útskúfun. Bráðsmellnar íslenskar kósíglæpasögur! Höfundur skrifar af lipurð í laufléttum stíl.
Yfirgefin bifreið við vegkant hverfur hægt sjónum eftir því sem fannfergið eykst. Inni í bílnum er svar við flókinni morðgátu sem lögreglunni hefur ekki tekist að leysa. Wisting lögregluforingi fær ábendingar sem vekja áhuga hans á málinu og í kjölfarið vísbendingar sem reynast margar og óljóst hvert þær kunna að leiða.
Ekki er allt gull sem glóir! Gestirnir hafa ekki hugmynd um hvað gerist bak við tjöldin á einu fínasta hóteli Reykjavíkur. Hvers vegna kemur til dæmis heimilislaust fólk að hótelinu á köldum vetrarnóttum meðan gestirnir eru í fastasvefni? Bráðskemmtileg og spennandi glæpasaga eftir nýjan íslenskan höfund.
Hercule Poirot er á leið til frönsku Rívíerunnar. Hann hugsar sér gott til glóðarinnar að hvílast og njóta lífsins um borð í lúxuslestinni bláu. Þar hittir hann fyrir dóttur þekkts bandarísks auðmanns, Ruth Kettering. Hún er á leið til fyrrverandi elskhuga síns. Morguninn eftir finnst hún myrt og dýrmætir skartgripir hennar eru horfnir.
Endurskoðuð útgáfa
Litlar konur er ein vinsælasta skáldsaga síðari tíma, hugljúf, sorgleg og skemmtileg í senn. Bókin segir uppvaxtarsögu fjögurra systra — hinnar fögru og dygðugu Möggu, strákastelpunnar Jóu, hinnar blíðlyndu Betu og ofdekruðu Önnu litlu. Tilvera þeirra fer úr skorðum þegar fjárhagur fjölskyldunnar hrynur.
Fyrir Fionu hefur Japan alltaf verið efst á óskalistanum. Þegar hún vinnur ferð þangað, þar sem allt er innifalið, virðist sem draumur hennar sé loks að rætast. En þegar hún kemur til hinnar líflegu og iðandi Tókýó stendur hún óvænt augliti til auglitis við manninn sem hún hélt eitt sinn að væri ást lífs hennar, ljósmyndarann glæsilega, Gabe.
Morðin í Åre 5
Margverðlaunuð glæpasería. Dularfull andlát meðal aldraðra á Åre-svæðinu, sænsku Ölpunum, vekja grunsemdir lögreglukonunnar Hönnu Ahlander um að ekki sé allt með felldu. Sívaxandi togstreita í sambandi hennar og Daniels Lindskog, nánasta samstarfsmanns hennar, gerir þeim hins vegar erfitt að einbeita sér að fullu að rannsókn málsins.
Heildarsafn ljóða Njarðar P. Njarðvík. „Lesendum er hér með boðið að stíga inn í ljóðheim „í faðmi tungunnar“ þar sem andartakið og eilífðin mætast í orði sem lýsir, talar til okkar með þögninni og leiðir okkur nær kjarna tilverunnar,“ skrifar Ólína Þorvarðardóttir prófessor meðal annars í inngangi að ljóðasafninu.
Sögumaður ferðast um sveitir Rússlands og hittir landeigendur, ráðsmenn, bændur og bóndakonur auk annarra minnisstæðra persóna. Hann lýsir þessu fólki með raunsönnum og eftirminnilegum hætti en sagan er þó ekki síður óður til rússneskrar náttúru. Þýðing Áslaugar á þessu meistaraverki, sem fékk Íslensku þýðingaverðlaunin 2026, kemur nú út í kilju.
Gjafasett
Komdu með Múmínsnáðanum og vinum hans út í nóttina og teldu stjörnurnar þangað til sólin rís og dagurinn kemur. Í þessu fallega gjafasetti er krúttlegur Múmínbangsi og bókin Múmín, óskastund – Teljum saman.
Ef þú hefur enn ekki hitt Múmínálf áttu ævintýri í vændum ... Haustkvöld eitt kemur Múmínfjölskyldan saman undir stjörnum prýddum himni til að rifja upp söguna af halastjörnunni sem kom einu sinni æðandi yfir himinhvolfið í átt að Múmíndal.
Áfallasaga
Í aldanna rás var sauðfjárbúskapur undirstaða íslensks samfélags og mótaði líf og afkomu þjóðarinnar. En búskapnum fylgdu áföll, svo sem eldgos og harðindi en ekki síst skæðir sauðfjársjúkdómar sem gátu á skömmum tíma ógnað afkomu heilu byggðarlaganna. Í þessari bók fjallar dr. Helgi Sigurðsson, dýralæknir og sagnfræðingur, um þessi áföll.
Katia Mann, eiginkona þýska skáldjöfursins Thomasar Mann, varði ævinni í að skýla eiginmanni sínum fyrir umheiminum svo að hann gæti skrifað meistaraverk sín. „Í þessari fjölskyldu verður að vera einhver sem ekki skrifar,“ sagði Katia jafnan þegar hún var hvött til að skrifa endurminningar sínar. Á efri árum féllst hún loks á að segja ævisögu sína.
Draugastofan 4
Loksins á að opna lestarstöðina í Drungadal aftur. Allir eru himinlifandi. En þá kemur draugur og vinnur skemmdarverk þannig að lestirnar komast ekki á stöðina! Bíbí borgarstjóri er örvæntingarfull og biður Krumma og Eddu hjá Draugastofunni um hjálp. Hver er draugurinn og af hverju vill hann ekki að lestirnar stoppi í Drungadal?
Syndsamlegt ævintýri fyrir fullorðin börn! Ný bók í seríunni skemmtilegu um litla, feita og fordómafulla letihauginn Evert Bäckström lögregluforingja sem með einhverjum óskiljanlegum hætti tekst jafnan að skjóta kollegum sínum ref fyrir rass. Bækur sænska verðlaunahöfundarins Leifs GW Persson hafa hvarvetna hlotið frábærar viðtökur.
„Vantar harðduglegan starfskraft í sauðburð í vor ...“ Ég skrifaði og spurðist fyrir. Sú sem svaraði var Elínóra. Hún gaf mér upp símann sinn og við ræddum saman símleiðis um launamál og aðstæður á bænum. Ég var ráðinn. Svo hélt ég af stað sem leið lá ... Mig gat ekki órað fyrir hvað ég hafði komið mér út í.
Síðasta sumar Klingsors eftir Nóbelsskáldið Hermann Hesse kom fyrst út árið 1919 og er einn af hápunktunum í bókmenntum þýska expressjónismans. Í bókinni segir frá síðasta sumri í lífi listmálarans Klingsors sem reynir að sigrast á dauðanum með því að mála nýjar og sífellt djarfari myndir.
Er leikur að læra?
Öll tengjumst við skólum landsins með einhverju móti – sem nemendur, starfsmenn, foreldrar, skattgreiðendur. Og öll höfum við skoðanir á því starfi sem unnið er í skólakerfinu. Í þessari bók fjallar hinn margreyndi skólamaður Sölvi Sveinsson um skólana sem nemandi, kennari og skólastjóri og segir sögur af mönnum og málefnum.