Síða 9 af 37
sögur
Er ástæða til að leiðrétta heillandi konu sem heldur að maður sé Magnús Tumi jarðeðlisfræðingur? Hvað gerist þegar sóprandíva í kirkjukór gerist talibani tónlistarinnar? Hvernig þekkti jólasveinninn litla héraskinnið í kvæðinu? Óvenjulegt og bráðskemmtilegt sagnasafn.
Saga og minningar
Vorið 2025 voru fimmtíu ár liðin frá því að fyrstu stúdentarnir útskrifuðust frá Flensborgarskóla í Hafnarfirði. Skólinn á sér þó lengri sögu og afar merkilega. Hér er sú saga rakin í máli og myndum auk þess sem 22 Flensborgarstúdentar rifja upp minningar sínar úr skólanum.
Úlfar var djúpt sokkinn í að setja saman marglaga minningar þegar hann var skyndilega úrskurðaður dauðvona. Það bætti nýrri vídd við verkið – lífið breytist þegar dauðinn er afhjúpaður þar sem hann liggur í leyni.
Eftir miklar breytingar í heimalandi Ísoldar og mömmu hennar neyðast þær til að flýja. Þær leggja í langa ferð í leit að nýjum heimkynnum en mæta óvæntum erfiðleikum þegar þær loksins nema land. Munu brúnu birnirnir taka hvítu birnurnar í sátt?
Hér birtast á mjög mörgum blaðsíðum fimm ár af fnæsi yfir öllu frá hversdeginum til heimsmála. Stundum er fnæst af gleði, stundum af reiði og stundum af uppgjöf. Myndasögurnar í bókinni spegla sameiginlega reynslu samfélags sem er oft flókin en oft svo fyndin.
Sjómennirnir og saga þeirra
Bók þessi er sjálfstætt framhald bókarinnar Fornbátar á Íslandi sem út kom árið 2023 og fjallaði um báta í opinberri eigu. Hér er athyglinni einkum beint að fornbátum í eigu einstaklinga. Birtir eru 50 stuttir kaflar um jafnmarga báta sem smíðaðir voru á árunum 1870–1950 og nokkra að auki frá sjötta áratugnum.
Gleði og sorgir í Hornbjargsvita
Harmþrungnar, glaðbeittar og sumpart ævintýralega fjarstæðukenndar frásagnir af fólki sem átti það sameiginlegt að velja sér búsetu á einum afskekktasta og harðbýlasta stað landsins. Fólkið í vitanum er samfelld saga vitavarða og fjölskyldna þeirra í Hornbjargsvita í 65 ár. Brjóstamjólk út í kaffið. Kýr sem þjáðist af heimþrá og músafár.
Þetta er ómissandi bók fyrir öll þau sem áhuga hafa á vinsælustu íþróttagrein í heimi, knattspyrnunni. Hér er spurt um íslenska boltann, enska boltann, Meistaradeildina, Evrópudeildina, Sambandsdeildina og svo auðvitað HM-karla sem haldin var sumarið 2026, sem og fleira.
Manchester United er eitt sögufrægasta fótboltalið heims. Lestu um bestu leikmenn félagsins, ótrúleg mörk, yfirburði í ensku úrvalsdeildinni og sögulega sigra í Evrópukeppnum. Kíktu á metin, sögurnar og tölfræðina sem sýna hvers vegna... Bókaflokkurinn Fótboltastjörnur hefur slegið í gegn hjá ungum sem öldnum.
Lestu sögu Lamines Yamal, undrastráksins hjá Barcelona sem hefur heillað áhorfendur í La Liga, hjálpað Spáni að vinna Evrópumótið 2024 og er orðinn einn besti ungi fótboltamaður heims. Bókaflokkurinn Fótboltastjörnur hefur slegið í gegn hjá ungum sem öldnum.
Þetta er saga Eníms Eními og fjölskyldu hans. Á ferð sinni um geiminn uppgötvar Ením í hverju leyndardómur svarthola er fólginn. Ógn steðjar að Algúrín, heimi harakana, sem teygir sig alla leið til Krular. Ením og ástvinir hans eru í hringiðu atburðanna og kanna nýja heima þar sem óvæntir bandamenn sýna þeim mikla velvild.
Stelpa og strákur hittast óvænt í erlendri borg og verða ástfangin. Þau koma úr ólíkum menningarheimum og átta sig fljótt á því að þeirra bíða margar og erfiðar hindranir eigi heitar tilfinningar að dafna. Ástin er voldugt afl en nær miskunnarlaus veruleikinn að buga hana?
Það er eitt stórt vandamál í lífi Fredda. Hann rekur við í tíma og ótíma. Hann ræður ekki við þetta. Maginn er í uppreisn og gerir Fredda lífið leitt alla daga. Stórskemmtileg bók fyrir yngstu lesendurna eftir Helga Jónsson. Líflegar og bráðsmellnar teikningar eftir Hrannar Atla Hauksson.
Í upphafi var Þögnin. Í marga mánuði var slökkt á heiminum – engin ljós, engar fréttir, ekkert net. Súpergreind hafði tekið völdin. Þegar kveikt er á öllu á ný stígur fram dularfull kona í Asíu. Hún er kölluð Frelsarinn af fylgjendum sínum og fremur röð kraftaverka sem gefa nýja von.
Bandaríkin á öldinni okkar: Hryðjuverkastríð, efnahagshrun og endalok heimsveldis
Hér er fjallað um Bandaríkin á 21. öld, uppruna og afleiðingar 11. september, efnahagshrunið sem öllu breytti og sundrung þjóðarinnar. Að hætti hússins fléttar höfundur eigin upplifanir inn í frásögnina. Bruce Springsteen kemur nokkuð við sögu og jafnvel Rocky er sóttur heim í þessu landi sem ávallt virðist geyma bæði það besta og það versta.
Sól Hlíf unga og bláhærða gengur að eiga hinn áttræða prófessor, Dufþak Dolla, öllum til furðu, en hann ætlar henni stórt hlutverk í lífinu. Hún skal á Bessastaði, þrátt fyrir kókbotnagleraugu og hring í nefinu. Lokabók í seríu. Fyrri bækur eru: Bónorðin tíu, Innsti kroppur í búri og Fimm ára brandarinn.
Bókina skrifa tvær vinkonur sem eru báðar félagssálfræðingar og starfa í sitthvori heimsálfunni, önnur sem prófessor í Malasíu og hin sem vinnusálfræðingur á Íslandi. Þær langaði að bera saman samfélög sín með gleraugum hamingjufræða og jákvæðrar sálfræði.
Í þessari bók eru valin verk úr safneign Listasafns Íslands sem fjalla með ólíkum hætti um þjóðsögur og sagnaheiminn sem tengist þeim.